لا إله إلا الله کا اصل پیغام کیا ہے؟

لَا إِلٰهَ إِلَّا اللَّهُ کا اصل پیغام توحید خالص ہے، یعنی اللہ کے سوا کوئی معبود، حاکم، مددگار، سجدہ کے لائق، یا بندگی کے قابل نہیں۔ یہ کلمہ اسلام کا بنیادی عقیدہ اور دعوتِ انبیاء کا خلاصہ ہے۔ قرآن مجید بارہا اس پیغام کو دہراتا ہے کہ ہر نبی نے سب سے پہلے اپنی قوم کو یہی تعلیم دی لَا إِلٰهَ إِلَّا اللَّهُ اللہ کے سوا کوئی معبود نہیں۔

فَٱعْلَمْ أَنَّهُۥ لَآ إِلَـٰهَ إِلَّا ٱللَّهُ
پس جان لو کہ اللہ کے سوا کوئی معبود نہیں۔
(محمد 19)

یہ آیت واضح کرتی ہے کہ لا إله إلا الله صرف زبانی اقرار نہیں، بلکہ علم، فہم، یقین، اور مکمل انقیاد کا تقاضا کرتا ہے۔ یعنی انسان ہر جھوٹے معبود خواہ وہ بت ہوں، خواہ اقتدار، خواہ نفسانی خواہشات، یا کسی بھی قسم کی روحانی یا سیاسی طاقت سب کو رد کرے اور صرف اللہ کو اپنا رب، معبود، اور حاکم مانے۔

اس کلمہ میں دو حصے ہیں

لَا إِلٰهَ کوئی معبود نہیں
یعنی ہر قسم کے جھوٹے معبودوں کا انکار۔

إِلَّا اللَّهُ سوائے اللہ کے
یعنی صرف اللہ ہی عبادت، اطاعت، محبت، خوف، اور بھروسا کے لائق ہے۔

وَإِلَـٰهُكُمْ إِلَـٰهٌۭ وَٟحِدٌۭ ۖ لَّآ إِلَـٰهَ إِلَّا هُوَ ٱلرَّحْمَـٰنُ ٱلرَّحِيمُ
اور تمہارا معبود ایک ہی معبود ہے، اس کے سوا کوئی معبود نہیں، وہی رحمٰن اور رحیم ہے۔
(البقرہ 163)

یعنیلَا إِلٰهَ إِلَّا اللَّهُ کا اصل پیغام صرف اللہ کی عبادت نہیں، بلکہ ہر باطل سے بغاوت اور اللہ کے سامنے مکمل تسلیم و اطاعت ہے۔ یہ کلمہ انسان کو روحانی غلامی سے نکال کر حقیقی آزادی، بندگی، اور نجات کی راہ پر ڈالتا ہے۔ یہی انبیاء کا پیغام ہے، یہی قرآن کی دعوت ہے، اور یہی ایمان کی بنیاد۔